دلوں کی طرح رگوں میں لہو دھڑکتا ہے

دلوں کی طرح رگوں میں لہو دھڑکتا ہے

کہ آبلہ ہے محبت کا جو تپکتا ہے

رہے کہیں بھی کہیں دور مجھ سے تو چھپ جائے

مرے خیالوں میں چہرہ ترا دمکتا ہے

یہ جسم و روح کی گہرائیوں میں اترے گا

یہ درد وہ نہیں آنکھوں سے جو چھلکتا ہے

گناہ گار نہ بن دل مرے خدا کے لئے

خیال یار کا دامن کوئی جھٹکتا ہے

سیاہ ہو گئے سب سبز و تر مرے دن رات

وہ چاند چھت پہ کسی اور کی چمکتا ہے

تمہارا لطف و کرم ہم فقیر لوگوں پر

کسی غریب کی چھت کی طرح ٹپکتا ہے