dilon ko luTne wali ada bhi yaad nahin

diloñ ko lūTne vaalī adā bhī yaad nahīñ

vafā kā zikr hī kaisā jafā bhī yaad nahīñ

muāmalāt-e-mohabbat to yaad kyā rahte

vo rasm-o-rāh kā ab silsila bhī yaad nahīñ

nikal paḌe haiñ safīne havāoñ ke ruḳh par

ḳhudā bhī yaad nahīñ nāḳhudā bhī yaad nahīñ

vo kā.enāt-e-mohabbat huī nazar ojhal

fusūñ-tarāzī-e-rasm-e-vafā bhī yaad nahīñ

tarīq-e-mehr-o-vafā ke chalan to duur rahe

kisī ko va.ada-e-mehr-o-vafā bhī yaad nahīñ

javāb meñ jo sunā thā vo yaad kyā hotā

hameñ to apnā sunāyā huā bhī yaad nahīñ

ye vāqi.a hai ki dekhā thā ḳhvāb manzil kā

ye hādisa hai ki ab rāsta bhī yaad nahīñ

kabhī sulūk kisī ne kiyā to thā lekin

ravā bhī yaad nahīñ nāravā bhī yaad nahīñ

ham un ko yaad dilā.eñ to kyā 'rishī' jin ko

niyāz-mandī-e-ahl-e-vafā bhī yaad nahīñ

dilon ko luTne wali ada bhi yaad nahin

wafa ka zikr hi kaisa jafa bhi yaad nahin

muamalat-e-mohabbat to yaad kya rahte

wo rasm-o-rah ka ab silsila bhi yaad nahin

nikal paDe hain safine hawaon ke ruKH par

KHuda bhi yaad nahin naKHuda bhi yaad nahin

wo kaenat-e-mohabbat hui nazar ojhal

fusun-taraazi-e-rasm-e-wafa bhi yaad nahin

tariq-e-mehr-o-wafa ke chalan to dur rahe

kisi ko wada-e-mehr-o-wafa bhi yaad nahin

jawab mein jo suna tha wo yaad kya hota

hamein to apna sunaya hua bhi yaad nahin

ye waqia hai ki dekha tha KHwab manzil ka

ye hadisa hai ki ab rasta bhi yaad nahin

kabhi suluk kisi ne kiya to tha lekin

rawa bhi yaad nahin narawa bhi yaad nahin

hum un ko yaad dilaen to kya 'rishi' jin ko

niyaz-mandi-e-ahl-e-wafa bhi yaad nahin