dilon ko ranj ye kaisa hai ye KHushi kya hai

diloñ ko rañj ye kaisā hai ye ḳhushī kyā hai

ye zulmatoñ se ujāloñ kī hamdamī kyā hai

havā.eñ shahr se rotī huī guzartī haiñ

diloñ meñ ḳhauf kī ye ek lahr sī kyā hai

udāsiyoñ kī ye parchhā.iyāñ sī duur talak

mah-o-nujūm kī āñkhoñ meñ ye namī kyā hai

ye khilkhilāte dar-o-bām meñ ghuTan kaisī

ye jagmagāte makānoñ meñ tīrgī kyā hai

bhare jahān meñ ban-bās kī ye kaifiyyat

har ek samt na jaane ye guuñj sī kyā hai

tire ḳhayāl meñ kaTtī hai 'umr phir bhī ham

ye sochte haiñ ki apnī bhī zindagī kyā hai

tamāzatoñ meñ bas ik ḳhushk peḌ kī chhāñv

hai jis pe naaz bahut vo bhī āgahī kyā hai

ye ashk ashk se ḳhvāboñ meñ raunaqeñ kaisī

ye daaġh daaġh tamannā meñ tāzgī kyā hai

mile haiñ dukh to hameñ roz hī tire dar se

magar ye aaj dukhoñ meñ na.ī ḳhushī kyā hai

dilon ko ranj ye kaisa hai ye KHushi kya hai

ye zulmaton se ujalon ki hamdami kya hai

hawaen shahr se roti hui guzarti hain

dilon mein KHauf ki ye ek lahr si kya hai

udasiyon ki ye parchhaiyan si dur talak

mah-o-nujum ki aankhon mein ye nami kya hai

ye khilkhilate dar-o-baam mein ghuTan kaisi

ye jagmagate makanon mein tirgi kya hai

bhare jahan mein ban-bas ki ye kaifiyyat

har ek samt na jaane ye gunj si kya hai

tere KHayal mein kaTti hai 'umr phir bhi hum

ye sochte hain ki apni bhi zindagi kya hai

tamazaton mein bas ek KHushk peD ki chhanw

hai jis pe naz bahut wo bhi aagahi kya hai

ye ashk ashk se KHwabon mein raunaqen kaisi

ye dagh dagh tamanna mein tazgi kya hai

mile hain dukh to hamein roz hi tere dar se

magar ye aaj dukhon mein nai KHushi kya hai