dilon mein aag lagao nawa-kashi hi karo

diloñ meñ aag lagāo navā-kashī hī karo

nahīñ hai shaġhl-e-junūñ kuchh to shā.irī hī karo

ye kyā ki baiTh rahe jā ke ḳhalvat-e-ġham meñ

nahīñ hai kuchh to chalo chal ke mai-kashī hī karo

yahī hunar kā sila hai to nāqidān-e-suḳhan

kisī usuul ke parde meñ dushmanī hī karo

sadā-e-dil na suno arz-e-hāl to sun lo

kahāñ ye farz hai tum par ki munsifī hī karo

yahī 'na.īm' bahut hai jo kaaT lo ye raat

ye kuchh zarūr nahīñ hai ki raushnī hī karo

dilon mein aag lagao nawa-kashi hi karo

nahin hai shaghl-e-junun kuchh to shairi hi karo

ye kya ki baiTh rahe ja ke KHalwat-e-gham mein

nahin hai kuchh to chalo chal ke mai-kashi hi karo

yahi hunar ka sila hai to naqidan-e-suKHan

kisi usul ke parde mein dushmani hi karo

sada-e-dil na suno arz-e-haal to sun lo

kahan ye farz hai tum par ki munsifi hi karo

yahi 'naim' bahut hai jo kaT lo ye raat

ye kuchh zarur nahin hai ki raushni hi karo