dilon mein dard bharta aankh mein gauhar banata hun

diloñ meñ dard bhartā aañkh meñ gauhar banātā huuñ

jinheñ maa.eñ pahantī haiñ maiñ vo zevar banātā huuñ

ġhanīm-e-vaqt ke hamle kā mujh ko ḳhauf rahtā hai

maiñ kāġhaz ke sipāhī kaaT kar lashkar banātā huuñ

purānī kashtiyāñ haiñ mere mallāhoñ kī qismat meñ

maiñ un ke bādbāñ siitā huuñ aur lañgar banātā huuñ

ye dhartī merī maañ hai is kī izzat mujh ko pyārī hai

maiñ is ke sar chhupāne ke liye chādar banātā huuñ

ye sochā hai ki ab ḳhāna-badoshī kar ke dekhūñgā

koī aafat hī aatī hai agar maiñ ghar banātā huuñ

harīfān-e-fusūñ-gar mū-qalam hai mere hāthoñ meñ

yahī merā asā hai is se maiñ azhdar banātā huuñ

mire ḳhvāboñ pe jab tīra-shabī yalġhār kartī hai

maiñ kirneñ gūñdhtā huuñ chāñd se paikar banātā huuñ

dilon mein dard bharta aankh mein gauhar banata hun

jinhen maen pahanti hain main wo zewar banata hun

ghanim-e-waqt ke hamle ka mujh ko KHauf rahta hai

main kaghaz ke sipahi kaT kar lashkar banata hun

purani kashtiyan hain mere mallahon ki qismat mein

main un ke baadban sita hun aur langar banata hun

ye dharti meri man hai is ki izzat mujh ko pyari hai

main is ke sar chhupane ke liye chadar banata hun

ye socha hai ki ab KHana-badoshi kar ke dekhunga

koi aafat hi aati hai agar main ghar banata hun

harifan-e-fusun-gar mu-qalam hai mere hathon mein

yahi mera asa hai is se main azhdar banata hun

mere KHwabon pe jab tira-shabi yalghaar karti hai

main kirnen gundhta hun chand se paikar banata hun