dilon mein duriyan aur fasle rakkhe hue hain

diloñ meñ dūriyāñ aur fāsle rakkhe hue haiñ

ba-zāhir har kisī se rābte rakkhe hue haiñ

ba-nām-e-zindagi kuchh qā.ede rakkhe hue haiñ

nazar ne apne apne zāviye rakkhe hue haiñ

baḌī tanzīm aur tadrīj se ghāyal huā huuñ

sitamgar ne sitam ke zābte rakkhe hue haiñ

hamārā to yahāñ par aur masraf hī nahīñ hai

jahāñ meñ ham tumhāre vāste rakkhe hue haiñ

mujhe mere alāva kuchh nazar aa.e to kaise

mire atrāf meñ to aa.ine rakkhe hue haiñ

jahāñ se bhī guzartā huuñ ulajh jaate haiñ paañv

zamīñ par har taraf hī dā.ere rakkhe hue haiñ

hamāre kul asāse kī koī qīmat to hogī

jo kuchh bhī hai tumhāre sāmne rakkhe hue haiñ

dilon mein duriyan aur fasle rakkhe hue hain

ba-zahir har kisi se rabte rakkhe hue hain

ba-nam-e-zindagi kuchh qaede rakkhe hue hain

nazar ne apne apne zawiye rakkhe hue hain

baDi tanzim aur tadrij se ghayal hua hun

sitamgar ne sitam ke zabte rakkhe hue hain

hamara to yahan par aur masraf hi nahin hai

jahan mein hum tumhaare waste rakkhe hue hain

mujhe mere alawa kuchh nazar aae to kaise

mere atraf mein to aaine rakkhe hue hain

jahan se bhi guzarta hun ulajh jate hain panw

zamin par har taraf hi daere rakkhe hue hain

hamare kul asase ki koi qimat to hogi

jo kuchh bhi hai tumhaare samne rakkhe hue hain