dilon mein jab guman honge makin aahista aahista

diloñ meñ jab gumāñ hoñge makīñ āhista āhista

to dhuñdlā jā.egā nūr-e-yaqīñ āhista āhista

dil-e-nādāñ abhī ḳhūgar nahīñ ye ġham uThāne kā

uThegī tere dar se ye jabīñ āhista āhista

nazar manzil pe ho to iḳhtilāf-e-rāh kā ġham kyā

pahuñchtī haiñ sabhī rāheñ vahīñ āhista āhista

kashish merī vafāoñ kī kahāñ tak rā.egāñ jaatī

jhukī merī taraf lauh-e-jabīñ āhista āhista

mire ahbāb ne us ko kiyā mujh se judā juuñ juuñ

vo aatā hī gayā mere qarīñ āhista āhista

lahū Tapkā hai rafta-rafta mizhgān-e-muġhannī se

huā hai ḳhush dil-e-andoh-gīñ āhista āhista

mire anfās kī har zarb thī kaarī se kārī-tar

karam farmā huā arsh-e-barīñ āhista āhista

huā taarī jumūd āfāq ke rangīñ ishāroñ par

huī gardish se be-bahra zamīñ āhista āhista

madad ai jazba-e-ashk-e-musalsal saañs lene de

sukhā lene de bhīgī āstīñ āhista āhista

ḳhudārā bas isī andāz se inkār kartā jā

banī jaatī hai haañ terī nahīñ āhista āhista

maiñ apne hoñT sī Dālūñgī lekin ye na dekhūñgī

pashemāñ ho nigāh-e-sharmagīñ āhista āhista

bahut āsāñ na samjho sang-dil dil mom ho jaanā

utartī hai nigāh-e-avvalīñ āhista āhista

koī jazba hai shāyad tujh meñ 'hānī' nā-tamām ab bhī

sunī hai dil meñ aahaT sī kahīñ āhista āhista

dilon mein jab guman honge makin aahista aahista

to dhundla jaega nur-e-yaqin aahista aahista

dil-e-nadan abhi KHugar nahin ye gham uThane ka

uThegi tere dar se ye jabin aahista aahista

nazar manzil pe ho to iKHtilaf-e-rah ka gham kya

pahunchti hain sabhi rahen wahin aahista aahista

kashish meri wafaon ki kahan tak raegan jati

jhuki meri taraf lauh-e-jabin aahista aahista

mere ahbab ne us ko kiya mujh se juda jun jun

wo aata hi gaya mere qarin aahista aahista

lahu Tapka hai rafta-rafta mizhgan-e-mughanni se

hua hai KHush dil-e-andoh-gin aahista aahista

mere anfas ki har zarb thi kari se kari-tar

karam farma hua arsh-e-barin aahista aahista

hua tari jumud aafaq ke rangin ishaaron par

hui gardish se be-bahra zamin aahista aahista

madad ai jazba-e-ashk-e-musalsal sans lene de

sukha lene de bhigi aastin aahista aahista

KHudara bas isi andaz se inkar karta ja

bani jati hai han teri nahin aahista aahista

main apne honT si Dalungi lekin ye na dekhungi

pasheman ho nigah-e-sharmagin aahista aahista

bahut aasan na samjho sang-dil dil mom ho jaana

utarti hai nigah-e-awwalin aahista aahista

koi jazba hai shayad tujh mein 'hani' na-tamam ab bhi

suni hai dil mein aahaT si kahin aahista aahista