dilon mein jalwa-fagan yaad-e-raftagan hai abhi

diloñ meñ jalva-fagan yād-e-raftagāñ hai abhī

charāġh bujh ga.e saare magar dhuāñ hai abhī

ḳhayāl-e-yār meñ pūchho na dil kahāñ hai abhī

ḳhayāl tak nahīñ pahuñche jahāñ vahāñ hai abhī

jalā ke ḳhaak kiyā barq ne haqīqat hai

magar chaman meñ mirī ḳhāk-e-āshiyāñ hai abhī

ḳhushī kī baat na kar ishratoñ kā zikr na chheḌ

ġham-e-hayāt mirī zeb-e-dāstāñ hai abhī

kaho to ḳhuld banā duuñ maiñ apne dāman par

ki fart-e-ġham se ravāñ chashm-e-ḳhūñ-fishāñ hai abhī

rukī rukī huī chaltī hai merī nabz-e-hayāt

kahāñ hai rashk-e-masīhā ki tan meñ jaañ hai abhī

ḳharīd le kisī yūsuf ko mere dil ko na dekh

ye jins husn ke bāzār meñ garāñ hai abhī

chaman se haath uThā luuñ maiñ kyoñ chaman vaalo

ki shāḳh shāḳh pe merā hī āshiyāñ hai abhī

kahāñ hai manzil-e-hastī kise ḳhabar 'ahsan'

ye jānte haiñ faqat kārvāñ ravāñ hai abhī

dilon mein jalwa-fagan yaad-e-raftagan hai abhi

charagh bujh gae sare magar dhuan hai abhi

KHayal-e-yar mein puchho na dil kahan hai abhi

KHayal tak nahin pahunche jahan wahan hai abhi

jala ke KHak kiya barq ne haqiqat hai

magar chaman mein meri KHak-e-ashiyan hai abhi

KHushi ki baat na kar ishraton ka zikr na chheD

gham-e-hayat meri zeb-e-dastan hai abhi

kaho to KHuld bana dun main apne daman par

ki fart-e-gham se rawan chashm-e-KHun-fishan hai abhi

ruki ruki hui chalti hai meri nabz-e-hayat

kahan hai rashk-e-masiha ki tan mein jaan hai abhi

KHarid le kisi yusuf ko mere dil ko na dekh

ye jins husn ke bazar mein garan hai abhi

chaman se hath uTha lun main kyon chaman walo

ki shaKH shaKH pe mera hi aashiyan hai abhi

kahan hai manzil-e-hasti kise KHabar 'ahsan'

ye jaante hain faqat karwan rawan hai abhi