دلوں میں جلوہ فگن یاد رفتگاں ہے ابھی

دلوں میں جلوہ فگن یاد رفتگاں ہے ابھی

چراغ بجھ گئے سارے مگر دھواں ہے ابھی

خیال یار میں پوچھو نہ دل کہاں ہے ابھی

خیال تک نہیں پہنچے جہاں وہاں ہے ابھی

جلا کے خاک کیا برق نے حقیقت ہے

مگر چمن میں مری خاک آشیاں ہے ابھی

خوشی کی بات نہ کر عشرتوں کا ذکر نہ چھیڑ

غم حیات مری زیب داستاں ہے ابھی

کہو تو خلد بنا دوں میں اپنے دامن پر

کہ فرط غم سے رواں چشم خوں فشاں ہے ابھی

رکی رکی ہوئی چلتی ہے میری نبض حیات

کہاں ہے رشک مسیحا کہ تن میں جاں ہے ابھی

خرید لے کسی یوسف کو میرے دل کو نہ دیکھ

یہ جنس حسن کے بازار میں گراں ہے ابھی

چمن سے ہاتھ اٹھا لوں میں کیوں چمن والو

کہ شاخ شاخ پہ میرا ہی آشیاں ہے ابھی

کہاں ہے منزل ہستی کسے خبر احسنؔ

یہ جانتے ہیں فقط کارواں رواں ہے ابھی