dilon mein jazba-e-nafrat hai kya kiya jae

diloñ meñ jazba-e-nafrat hai kyā kiyā jaa.e

zabāñ pe da.avā-e-ulfat hai kyā kiyā jaa.e

hazār qism ke ilzām sun ke bhī chup haiñ

hamārā jurm sharāfat hai kyā kiyā jaa.e

na dushmanoñ se adāvat na dostoñ kā lihāz

isī kā naam sadāqat hai kyā kiyā jaa.e

hamāre siine meñ patthar nahīñ hai ai logo

hameñ bhī pās-e-mohabbat hai kyā kiyā jaa.e

dūkān-e-ilm-o-hunar kyoñ sajā na le koī

ye rāz-e-izzat-o-shohrat hai kyā kiyā jaa.e

ye ik ḳhalish ye tajassus ye hasratoñ kā hujūm

isī se ziist ibārat hai kyā kiyā jaa.e

badal ke dekhe bhī uslūb tishnagī na ga.ī

dil-o-nazar kī hikāyat hai kyā kiyā jaa.e

maiñ ḳhud ḳhulūs se apne bahut pareshāñ huuñ

ab is kī kis ko zarūrat hai kyā kiyā jaa.e

zamāna-sāzī ko duniyā hunar kahe lekin

jab is ḳhayāl se nafrat hai kyā kiyā jaa.e

dilon mein jazba-e-nafrat hai kya kiya jae

zaban pe dawa-e-ulfat hai kya kiya jae

hazar qism ke ilzam sun ke bhi chup hain

hamara jurm sharafat hai kya kiya jae

na dushmanon se adawat na doston ka lihaz

isi ka nam sadaqat hai kya kiya jae

hamare sine mein patthar nahin hai ai logo

hamein bhi pas-e-mohabbat hai kya kiya jae

dukan-e-ilm-o-hunar kyon saja na le koi

ye raaz-e-izzat-o-shohrat hai kya kiya jae

ye ek KHalish ye tajassus ye hasraton ka hujum

isi se zist ibarat hai kya kiya jae

badal ke dekhe bhi uslub tishnagi na gai

dil-o-nazar ki hikayat hai kya kiya jae

main KHud KHulus se apne bahut pareshan hun

ab is ki kis ko zarurat hai kya kiya jae

zamana-sazi ko duniya hunar kahe lekin

jab is KHayal se nafrat hai kya kiya jae