dilon pe yun bhi ajab iKHtiyar dekha hai

diloñ pe yuuñ bhī ajab iḳhtiyār dekhā hai

jo pur-sukūñ the unheñ be-qarār dekhā hai

hilā sake na qadam jin ke bāda-o-sāġhar

unhī pe zulf-o-nazar kā ḳhumār dekhā hai

hai imtizāj ajab rañg-o-husn kā us meñ

ki jis ne dekhā use bār-bār dekhā hai

khulā hai raaz pas-e-marg zaat kā apnī

fazā meñ uḌtā huā jab ġhubār dekhā hai

jo aa sake na kabhī qaid-e-zāt meñ apnī

unhī pe terā sabhī iḳhtiyār dekhā hai

junūñ ne kar bhī liyā paar dard kā sahrā

abhī ḳhirad ko sar-e-rahguzār dekhā hai

bas iztirāb-o-ḳhalish dard-o-āh aur aañsū

har ek dil meñ vafā kā mazār dekhā hai

to kyā lubhā.egī dil ko shaguftagī-e-gul

ki jab nazar ne badan kī bahār dekhā hai

thā jin ko naaz bahut apnī ḳhush-libāsī par

rah-e-junūñ meñ unheñ tār-tār dekhā hai

dilon pe yun bhi ajab iKHtiyar dekha hai

jo pur-sukun the unhen be-qarar dekha hai

hila sake na qadam jin ke baada-o-saghar

unhi pe zulf-o-nazar ka KHumar dekha hai

hai imtizaj ajab rang-o-husn ka us mein

ki jis ne dekha use bar-bar dekha hai

khula hai raaz pas-e-marg zat ka apni

faza mein uDta hua jab ghubar dekha hai

jo aa sake na kabhi qaid-e-zat mein apni

unhi pe tera sabhi iKHtiyar dekha hai

junun ne kar bhi liya par dard ka sahra

abhi KHirad ko sar-e-rahguzar dekha hai

bas iztirab-o-KHalish dard-o-ah aur aansu

har ek dil mein wafa ka mazar dekha hai

to kya lubhaegi dil ko shaguftagi-e-gul

ki jab nazar ne badan ki bahaar dekha hai

tha jin ko naz bahut apni KHush-libasi par

rah-e-junun mein unhen tar-tar dekha hai