dilon se aarzu-e-umr-e-jawedan na gai

diloñ se ārzū-e-umr-e-jāvedāñ na ga.ī

koī nigāh pas-e-gard-e-kārvāñ na ga.ī

vo aur chiiz hai hote haiñ jis se dil shādāb

tirī bahār se vīrānī-e-ḳhizāñ na ga.ī

nikal ke ḳhuld se bhī aadmī na pachhtāyā

zamīñ pe bhī chaman-ārā.ī-e-gumāñ na ga.ī

bas ek kunj-e-qafas tak na aa sakī varna

sabā chalī to chaman meñ kahāñ kahāñ na ga.ī

kahāñ kahāñ na huiiñ sabt husn kī mohreñ

kalī havā meñ bikhar kar bhī rā.egāñ na ga.ī

mirī duā kī ye ġhairat hai kitnī qābil-e-dād

ki lab tak aa.ī magar sū-e-asmāñ na ga.ī

dayār-e-ishq khañDar aur dasht-e-dil sunsān

magar 'nadīm' kī rañgīni-e-bayāñ na ga.ī

dilon se aarzu-e-umr-e-jawedan na gai

koi nigah pas-e-gard-e-karwan na gai

wo aur chiz hai hote hain jis se dil shadab

teri bahaar se virani-e-KHizan na gai

nikal ke KHuld se bhi aadmi na pachhtaya

zamin pe bhi chaman-arai-e-guman na gai

bas ek kunj-e-qafas tak na aa saki warna

saba chali to chaman mein kahan kahan na gai

kahan kahan na huin sabt husn ki mohren

kali hawa mein bikhar kar bhi raegan na gai

meri dua ki ye ghairat hai kitni qabil-e-dad

ki lab tak aai magar su-e-asman na gai

dayar-e-ishq khanDar aur dasht-e-dil sunsan

magar 'nadim' ki rangini-e-bayan na gai