dilon se tark-e-talluq ka Dar nikal jae

diloñ se tark-e-ta.alluq kā Dar nikal jaa.e

tirā mizāj zarā sā agar badal jaa.e

sabhī ke sāmne hai ik hujūm rishtoñ kā

vo kāmrāñ hai jo is bhiiḌ se nikal jaa.e

is irtikāb-e-tamannā pe kyā sazā doge

tumhāre qadmoñ pe koī agar machal jaa.e

mire salām kā rasman bhī dījiye na javāb

mirī taraf se kabhī zehn agar badal jaa.e

sivā.e ik tire chehre ke bhuul kar maiñ ne

agar nigāh uThā.ī ho aañkh jal jaa.e

dilon se tark-e-talluq ka Dar nikal jae

tera mizaj zara sa agar badal jae

sabhi ke samne hai ek hujum rishton ka

wo kaamran hai jo is bhiD se nikal jae

is irtikab-e-tamanna pe kya saza doge

tumhaare qadmon pe koi agar machal jae

mere salam ka rasman bhi dijiye na jawab

meri taraf se kabhi zehn agar badal jae

siwae ek tere chehre ke bhul kar main ne

agar nigah uThai ho aankh jal jae