dilon se uThne lagega dhuan to kya hoga

diloñ se uThne lagegā dhuāñ to kyā hogā

badal gayā kabhī rañg-e-jahāñ to kyā hogā

machal gayā jo dil-e-nā-tavāñ to kyā hogā

uThā na ishq kā bār-e-girāñ to kyā hogā

hameñ fareb-e-mohabbat qubūl hai lekin

jo khul ga.ī kabhī dil kī zabāñ to kyā hogā

ham ahl-e-dil haiñ kisī imtihāñ se kyā Darte

liyā falak ne tirā imtihāñ to kyā hogā

hazār dard sameTe hue huuñ ik dil meñ

bikhar ga.ī jo mirī dāstāñ to kyā hogā

'hayāt' kis ko dikhā.uñgī ābgīna-e-dil

milā na koī yahāñ qadr-dāñ to kyā hogā

dilon se uThne lagega dhuan to kya hoga

badal gaya kabhi rang-e-jahan to kya hoga

machal gaya jo dil-e-na-tawan to kya hoga

uTha na ishq ka bar-e-giran to kya hoga

hamein fareb-e-mohabbat qubul hai lekin

jo khul gai kabhi dil ki zaban to kya hoga

hum ahl-e-dil hain kisi imtihan se kya Darte

liya falak ne tera imtihan to kya hoga

hazar dard sameTe hue hun ek dil mein

bikhar gai jo meri dastan to kya hoga

'hayat' kis ko dikhaungi aabgina-e-dil

mila na koi yahan qadr-dan to kya hoga