dimagh-o-dil pe ho kya asar andhere ka

dimāġh-o-dil pe ho kyā asar añdhere kā

ki dīda-var bhī hai ab ham-safar añdhere kā

dayār-e-nūr meñ har samt ḳhaak uḌne lagī

vajūd hone lagā mo'atabar añdhere kā

ye rāsta to charāġhoñ se jagmagātā hai

idhar se hone lagā kyuuñ guzar añdhere kā

ab is ke phūlne-phalne meñ din hī kitne haiñ

jaḌeñ jamā to chukā hai shajar añdhere kā

yahāñ to raushniyoñ kā paḌāv hotā hai

to kyā yahīñ pe basegā nagar añdhere kā

sisaktī sham.oñ kā ye āḳhirī Thikānā hai

shurūa hogā yahīñ se safar añdhere kā

basīratoñ ke amiiñ haiñ hamīñ magar ham ne

basā liyā hai rag-o-pai meñ Dar añdhere kā

manāo ḳhair ujāloñ ke bām-o-dar vaalo

fazā meñ raqs-kunāñ hai sharar añdhere kā

vo apne saath to le kar charāġh chalte the

shikār kyuuñ hue ahl-e-nazar añdhere kā

dimagh-o-dil pe ho kya asar andhere ka

ki dida-war bhi hai ab ham-safar andhere ka

dayar-e-nur mein har samt KHak uDne lagi

wajud hone laga mo'atabar andhere ka

ye rasta to charaghon se jagmagata hai

idhar se hone laga kyun guzar andhere ka

ab is ke phulne-phalne mein din hi kitne hain

jaDen jama to chuka hai shajar andhere ka

yahan to raushniyon ka paDaw hota hai

to kya yahin pe basega nagar andhere ka

sisakti shamon ka ye aaKHiri Thikana hai

shurua hoga yahin se safar andhere ka

basiraton ke amin hain hamin magar hum ne

basa liya hai rag-o-pai mein Dar andhere ka

manao KHair ujalon ke baam-o-dar walo

faza mein raqs-kunan hai sharar andhere ka

wo apne sath to le kar charagh chalte the

shikar kyun hue ahl-e-nazar andhere ka