دن آخری ہے سال کا دل کی کتاب دیکھ

دن آخری ہے سال کا دل کی کتاب دیکھ

پوری ہوئی ہیں خواہشیں کتنی حساب دیکھ

شاید کسی نے توڑ دیا ہے کسی کا دل

تپتی سڑک پہ بکھرا پڑا ہے گلاب دیکھ

کیوں چن رہا ہے خواب شکستہ کی کرچیاں

خوابوں کی کیا کمی ہے کوئی اور خواب دیکھ

بے چہرگی نے توڑ دئے سارے آئنے

نازل ہوا ہے ہم پہ یہ کیسا عذاب دیکھ

کمرے میں بند ہو کے نہ پی زہر تیرگی

دروازہ کھول گھر سے نکل آفتاب دیکھ

میں دیکھتا ہوں لاتی ہے کیا رنگ مے کشی

تو صرف دور بیٹھ کے رنگ شراب دیکھ