din Dhale ka ye talluq KHwab sa rah jaega

din Dhale kā ye ta.alluq ḳhvāb sā rah jā.egā

ham chale jā.eñge aur tū jāgtā rah jā.egā

fāsle āfāq ko le kar kahīñ kho jā.eñge

kā.enātoñ ke tasarruf meñ ḳhalā rah jā.egā

kuuñj dariyā choñch meñ bhar kar havā ho jā.egī

pāniyoñ kā dāstāñ-go dekhtā rah jā.egā

jāgte jangal meñ kho jā.eñgī pariyāñ ḳhvāb kī

muntazir nīñdoñ kā darvāza khulā rah jā.egā

zād-e-rah meñ rakh le sūraj bāñdh kar chāhe 'navāb'

shām-nagrī kī taraf jo bhī chalā rah jā.egā

din Dhale ka ye talluq KHwab sa rah jaega

hum chale jaenge aur tu jagta rah jaega

fasle aafaq ko le kar kahin kho jaenge

kaenaton ke tasarruf mein KHala rah jaega

kunj dariya chonch mein bhar kar hawa ho jaegi

paniyon ka dastan-go dekhta rah jaega

jagte jangal mein kho jaengi pariyan KHwab ki

muntazir nindon ka darwaza khula rah jaega

zad-e-rah mein rakh le suraj bandh kar chahe 'nawab'

sham-nagri ki taraf jo bhi chala rah jaega