din guzra aur sham Dhali phir wahshat le kar aai raat

din guzrā aur shaam Dhalī phir vahshat le kar aa.ī raat

jab bhī us kā hijr manāyā ham ne vo kahlā.ī raat

us ko rone se pahle kuchh ham ne yuuñ tayyārī kī

kone meñ tanhā.ī rakkhī kamre meñ phailā.ī raat

tū ne kaise soch liyā ki tere tohfe bhuul ga.e

dil ne tere ġham ko pahnā āñkhoñ ko pahnā.ī raat

sāvan aayā lekin sūkhī ehsāshoñ kī hariyālī

banjar dil meñ aañsū bo.e uupar se barsā.ī raat

koī bhī mausam aayā ho ham par to barsāt huī

us kī yādoñ ne jo gherā dopahroñ par chhā.ī raat

us pal jaise bol paḌā ho dīvāroñ kā sannāTā

us kī rāheñ takte takte jaise ho uktā.ī raat

kitne hī manzar shāmil haiñ merī suunī āñkhoñ meñ

chup ke se aa ke kartī hai palkoñ kī turpāī raat

chāhat kī ye reshmī girheñ aur palkoñ par niiñd kā bojh

yādoñ se jo bach nikle to ḳhvāboñ ne uljhā.ī raat

din guzra aur sham Dhali phir wahshat le kar aai raat

jab bhi us ka hijr manaya hum ne wo kahlai raat

us ko rone se pahle kuchh hum ne yun tayyari ki

kone mein tanhai rakkhi kamre mein phailai raat

tu ne kaise soch liya ki tere tohfe bhul gae

dil ne tere gham ko pahna aankhon ko pahnai raat

sawan aaya lekin sukhi ehsashon ki hariyali

banjar dil mein aansu boe upar se barsai raat

koi bhi mausam aaya ho hum par to barsat hui

us ki yaadon ne jo ghera dopahron par chhai raat

us pal jaise bol paDa ho diwaron ka sannaTa

us ki rahen takte takte jaise ho uktai raat

kitne hi manzar shamil hain meri suni aankhon mein

chup ke se aa ke karti hai palkon ki turpai raat

chahat ki ye reshmi girhen aur palkon par nind ka bojh

yaadon se jo bach nikle to KHwabon ne uljhai raat