din jawani ke na barbaad guzare hote

din javānī ke na barbād guzāre hote

ai mirī jaan agar aap hamāre hote

lā ke rakh detā tire sāmne duniyā saarī

chāñd hāthoñ pe to qadmoñ meñ sitāre hote

kaun mānegā mohabbat kā payambar maiñ huuñ

ai ḳhudā mujh pe sahīfe to utāre hote

tū mere dukh ko samajhtā jo bichhaḌte tujh se

log aise jo tujhe jaan se pyāre hote

gar vo pūchheñ bhī mirī āḳhirī ḳhvāhish to kahūñ

kyā hī achchhā thā agar aap hamāre hote

ġham nahīñ is kā ki haarī hai ye baazī ham ne

ġham magar ye hai zarā laḌ ke to haare hote

vasl kī rut bhī hameñ raas na aa.ī 'haidar'

kaash itne bhī na gardish meñ sitāre hote

din jawani ke na barbaad guzare hote

ai meri jaan agar aap hamare hote

la ke rakh deta tere samne duniya sari

chand hathon pe to qadmon mein sitare hote

kaun manega mohabbat ka payambar main hun

ai KHuda mujh pe sahife to utare hote

tu mere dukh ko samajhta jo bichhaDte tujh se

log aise jo tujhe jaan se pyare hote

gar wo puchhen bhi meri aaKHiri KHwahish to kahun

kya hi achchha tha agar aap hamare hote

gham nahin is ka ki haari hai ye bazi hum ne

gham magar ye hai zara laD ke to haare hote

wasl ki rut bhi hamein ras na aai 'haidar'

kash itne bhi na gardish mein sitare hote