din ka malal sham ki wahshat kahan se laen

din kā malāl shaam kī vahshat kahāñ se laa.eñ

zar-zadgān-e-shahr mohabbat kahāñ se laa.eñ

sarf-e-shumār-e-daulat-e-duniyā hue jo log

vo nā-murād dil kī imārat kahāñ se laa.eñ

saarā lahū to sarf-e-shumār-o-adū huā

shām-e-firāq-e-yār kī ujrat kahāñ se laa.eñ

vo jin ke dil ke saath na dhaḌkā ho koī dil

zinda bhī haiñ to us kī shahādat kahāñ se laa.eñ

do harf apne dil kī gavāhī ke vāste

kahnā bhī chāhte hoñ to jur.at kahāñ se laa.eñ

be-chehra log chehra dikhāne ke shauq meñ!

ā.īne maañg laa.e haiñ hairat kahāñ se laa.eñ

apne hī naqsh-e-pā ke aqīdat-guzār log

kuchh aur dekhne ko basārat kahāñ se laa.eñ

kuchh zargirān-e-shahr ne ahl-e-kamāl kā

chehra banā liyā qad-o-qāmat kahāñ se laa.eñ

ujḌe nahīñ kabhī vo jo TuuTe nahīñ kabhī

vo log harf likhne kī quvvat kahāñ se laa.eñ

jab dar hī band hoñ koī ḳhushbū kahāñ se aa.e

gar lafz likh bhī deñ to halāvat kahāñ se laa.eñ

din ka malal sham ki wahshat kahan se laen

zar-zadgan-e-shahr mohabbat kahan se laen

sarf-e-shumar-e-daulat-e-duniya hue jo log

wo na-murad dil ki imarat kahan se laen

sara lahu to sarf-e-shumar-o-adu hua

sham-e-firaq-e-yar ki ujrat kahan se laen

wo jin ke dil ke sath na dhaDka ho koi dil

zinda bhi hain to us ki shahadat kahan se laen

do harf apne dil ki gawahi ke waste

kahna bhi chahte hon to jurat kahan se laen

be-chehra log chehra dikhane ke shauq mein!

aaine mang lae hain hairat kahan se laen

apne hi naqsh-e-pa ke aqidat-guzar log

kuchh aur dekhne ko basarat kahan se laen

kuchh zargiran-e-shahr ne ahl-e-kamal ka

chehra bana liya qad-o-qamat kahan se laen

ujDe nahin kabhi wo jo TuTe nahin kabhi

wo log harf likhne ki quwwat kahan se laen

jab dar hi band hon koi KHushbu kahan se aae

gar lafz likh bhi den to halawat kahan se laen