din ke haare hue jab sham ko ghar jate hain

din ke haare hue jab shaam ko ghar jaate haiñ

zindagī ham tirī āġhosh meñ mar jaate haiñ

koī to baat hai jo ab bhī tirī jānib ham

dil ijāzat nahīñ detā hai magar jaate haiñ

aaj bhī kachche ghaḌoñ par hī bharosa kar ke

'ishq vaale chaḌhe dariyā meñ utar jaate haiñ

ham ġharīboñ ke taraf-dār bahut haiñ lekin

baat insāf kī aa.e to mukar jaate haiñ

kaun phir sach kī himāyat meñ gavāhī degā

ham bhī qātil kī himāyat meñ agar jaate haiñ

aañkh sūraj se milāne kā jinheñ dā'vā hai

ek jugnū bhī chamak jaa.e to Dar jaate haiñ

is adākār zamāne ko suḳhanvar 'tashna'

yaad aate haiñ ki jis vaqt guzar jaate haiñ

din ke haare hue jab sham ko ghar jate hain

zindagi hum teri aaghosh mein mar jate hain

koi to baat hai jo ab bhi teri jaanib hum

dil ijazat nahin deta hai magar jate hain

aaj bhi kachche ghaDon par hi bharosa kar ke

'ishq wale chaDhe dariya mein utar jate hain

hum gharibon ke taraf-dar bahut hain lekin

baat insaf ki aae to mukar jate hain

kaun phir sach ki himayat mein gawahi dega

hum bhi qatil ki himayat mein agar jate hain

aankh suraj se milane ka jinhen da'wa hai

ek jugnu bhi chamak jae to Dar jate hain

is adakar zamane ko suKHanwar 'tashna'

yaad aate hain ki jis waqt guzar jate hain