din ke pahle pahr main hi apna bistar chhoD kar

din ke pahle pahr meñ hī apnā bistar chhoḌ kar

raushnī niklī hai niiñd apnī falak par chhoḌ kar

vo musavvir-dar-musavvir kho rahī hai apne rañg

ik dhanak bhaTkī hai kitnā apnā ambar chhoḌ kar

vaqt hai ab bhī manā luuñ chal ke us ko ek din

ghar nikal jā.egā varna ek din ghar chhoḌ kar

āñsūo thoḌī madad mujh ko tumhārī chāhiye

ġham chale jā.eñge varna dil ko banjar chhoḌ kar

ḳhvāb āñkheñ chhoḌ kar kahiye kahāñ jā.eñge ab

silvaTeñ kyā mar nahīñ jā.eñgī chādar chhoḌ kar

lahr ban kar us ne thoḌī duur tak pīchhā kiyā

jā rahā thā apnā dariyā ik shanāvar chhoḌ kar

jal uTheñge paañv 'ātish' un ke chhūte hī zamīñ

ḳhvāb gar utre mirī āñkhoñ kā bistar chhoḌ kar

din ke pahle pahr mein hi apna bistar chhoD kar

raushni nikli hai nind apni falak par chhoD kar

wo musawwir-dar-musawwir kho rahi hai apne rang

ek dhanak bhaTki hai kitna apna ambar chhoD kar

waqt hai ab bhi mana lun chal ke us ko ek din

ghar nikal jaega warna ek din ghar chhoD kar

aansuo thoDi madad mujh ko tumhaari chahiye

gham chale jaenge warna dil ko banjar chhoD kar

KHwab aankhen chhoD kar kahiye kahan jaenge ab

silwaTen kya mar nahin jaengi chadar chhoD kar

lahr ban kar us ne thoDi dur tak pichha kiya

ja raha tha apna dariya ek shanawar chhoD kar

jal uThenge panw 'atish' un ke chhute hi zamin

KHwab gar utre meri aankhon ka bistar chhoD kar