din ko bahr-o-bar ka sina chir kar rakh dijiye

din ko bahr-o-bar kā siina chiir kar rakh dījiye

raat ko phir pā-e-gul-rūyāñ pe sar rakh dījiye

dekhiye phir kyā damakte haiñ gul-andāmān-e-shahr

ik zarā un meñ mohabbat kā sharar rakh dījiye

āhuvān-e-shab gurezāñ hoñ to un kī raah meñ

dām-e-dil rakh dījiye dām-e-nazar rakh dījiye

but-parastī kījiye is shiddat-e-ehsās se

sañg meñ bhī juzv-e-ehsās-o-ḳhabar rakh dījiye

zohd agar jang-āzmā ho khīñchiye shamshīr-e-shauq

husn agar madd-e-muqābil ho sipar rakh dījiye

rāhat-e-jān-e-'zafar' haiñ shāhidān-e-be-hunar

rauñdne ko un ke qadmoñ meñ hunar rakh dījiye

din ko bahr-o-bar ka sina chir kar rakh dijiye

raat ko phir pa-e-gul-ruyan pe sar rakh dijiye

dekhiye phir kya damakte hain gul-andaman-e-shahr

ek zara un mein mohabbat ka sharar rakh dijiye

aahuwan-e-shab gurezan hon to un ki rah mein

dam-e-dil rakh dijiye dam-e-nazar rakh dijiye

but-parasti kijiye is shiddat-e-ehsas se

sang mein bhi juzw-e-ehsas-o-KHabar rakh dijiye

zohd agar jang-azma ho khinchiye shamshir-e-shauq

husn agar madd-e-muqabil ho sipar rakh dijiye

rahat-e-jaan-e-'zafar' hain shahidan-e-be-hunar

raundne ko un ke qadmon mein hunar rakh dijiye