din ko din raat ko main raat na likhne paun

din ko din raat ko maiñ raat na likhne pā.ūñ

un kī koshish hai ki hālāt na likhne pā.ūñ

hindū ko hindū musalmān ko likkhūñ muslim

kabhī in donoñ ko ik saath na likhne pā.ūñ

bas qalam-band kiye jā.ūñ maiñ un kī har baat

dil se jo uThtī hai vo baat na likhne pā.ūñ

soch to letā huuñ kyā likhnā hai par likhte samay

kāñpte kyuuñ hai mire haath na likhne pā.ūñ

jiit par un kī lagā duuñ maiñ qasīdoñ kī jhaḌī

maat ko un kī magar maat na likhne pā.ūñ

shukr hī shukr likhe jā.ūñ maiñ un ke haq meñ

kabhī un se maiñ shikāyāt na likhne pā.ūñ

apne hoñToñ pe na lā pā.ūñ maiñ apne naale

apnī hī āñkhoñ kī barsāt na likhne pā.ūñ

jin savāloñ se tabassum meñ ḳhalal paḌtā ho

kabhī vo talḳh savālāt na likhne pā.ūñ

ḳhud ko maazī meñ rakhūñ haal meñ rahte hue bhī

na.e vaqtoñ ke ḳhayālāt na likhne pā.ūñ

un kī koshish hai kaleja ho mirā patthar kā

un kī koshish hai maiñ jazbāt na likhne pā.ūñ

din ko din raat ko main raat na likhne paun

un ki koshish hai ki haalat na likhne paun

hindu ko hindu musalman ko likkhun muslim

kabhi in donon ko ek sath na likhne paun

bas qalam-band kiye jaun main un ki har baat

dil se jo uThti hai wo baat na likhne paun

soch to leta hun kya likhna hai par likhte samay

kanpte kyun hai mere hath na likhne paun

jit par un ki laga dun main qasidon ki jhaDi

mat ko un ki magar mat na likhne paun

shukr hi shukr likhe jaun main un ke haq mein

kabhi un se main shikayat na likhne paun

apne honTon pe na la paun main apne nale

apni hi aankhon ki barsat na likhne paun

jin sawalon se tabassum mein KHalal paDta ho

kabhi wo talKH sawalat na likhne paun

KHud ko mazi mein rakhun haal mein rahte hue bhi

nae waqton ke KHayalat na likhne paun

un ki koshish hai kaleja ho mera patthar ka

un ki koshish hai main jazbaat na likhne paun