din ko the hum ek tasawwur raat ko ek KHwab the

din ko the ham ik tasavvur raat ko ik ḳhvāb the

ham samundar ho ke bhī is ke liye pāyāb the

sard se marmar pe shab ko jo ubhāre the nuqūsh

sub.h ko dekhā to sab aks-e-hunar nāyāb the

vo ilāqe zindagī-bhar jo namī māñgā kiye

kal ghaTā.eñ chhā.īñ to dekhā ki zer-e-āb the

ik kiran bhī ahd meñ un ke na bhūle se milī

din ke jo sūraj the apne raat ke mahtāb the

aaj un peḌoñ pe sūraj kī kiran ruktī nahīñ

kal yahī the bār-āvar kal yahī shādāb the

ab khulā ki būñdiyāñ motī haiñ Dhaltī thiiñ kahāñ

ham jo Duube haath apne gauhar-e-nāyāb the

koī apnī bhī haqīqat mil ke dariyā se 'shafaq'

chhoTe chhoTe apne naale kis qadar betāb the

din ko the hum ek tasawwur raat ko ek KHwab the

hum samundar ho ke bhi is ke liye payab the

sard se marmar pe shab ko jo ubhaare the nuqush

subh ko dekha to sab aks-e-hunar nayab the

wo ilaqe zindagi-bhar jo nami manga kiye

kal ghaTaen chhain to dekha ki zer-e-ab the

ek kiran bhi ahd mein un ke na bhule se mili

din ke jo suraj the apne raat ke mahtab the

aaj un peDon pe suraj ki kiran rukti nahin

kal yahi the bar-awar kal yahi shadab the

ab khula ki bundiyan moti hain Dhalti thin kahan

hum jo Dube hath apne gauhar-e-nayab the

koi apni bhi haqiqat mil ke dariya se 'shafaq'

chhoTe chhoTe apne nale kis qadar betab the