din mein bhi hasrat-e-mahtab liye phirte hain

din meñ bhī hasrat-e-mahtāb liye phirte haiñ

haa.e kyā log haiñ kyā ḳhvāb liye phirte haiñ

ham kahāñ manzar-e-shādāb liye phirte haiñ

dar-ba-dar dīda-e-ḳhūñ-nāb liye phirte haiñ

vo qayāmat se to pahle nahīñ milne vaalā

kis liye phir dil-e-betāb liye phirte haiñ

ham se tahzīb kā dāman nahīñ chhoḌā jaatā

dasht-e-vahshat meñ bhī ādāb liye phirte haiñ

saltanat haath se jaatī rahī lekin ham log

chand baḳhshe hue alqāb liye phirte haiñ

ek din honā hai miTTī kā nivāla phir bhī

jism par atlas-o-kamḳhvāb liye phirte haiñ

ham-navā.ī kahāñ hāsil hai kisī kī mujh ko

ham-navāoñ ko to ahbāb liye phirte haiñ

kis liye log hameñ sar pe biThā.eñge farāġh

ham kahāñ ke par-e-surḳhāb liye phirte haiñ

din mein bhi hasrat-e-mahtab liye phirte hain

hae kya log hain kya KHwab liye phirte hain

hum kahan manzar-e-shadab liye phirte hain

dar-ba-dar dida-e-KHun-nab liye phirte hain

wo qayamat se to pahle nahin milne wala

kis liye phir dil-e-betab liye phirte hain

hum se tahzib ka daman nahin chhoDa jata

dasht-e-wahshat mein bhi aadab liye phirte hain

saltanat hath se jati rahi lekin hum log

chand baKHshe hue alqab liye phirte hain

ek din hona hai miTTi ka niwala phir bhi

jism par atlas-o-kamKHwab liye phirte hain

ham-nawai kahan hasil hai kisi ki mujh ko

ham-nawaon ko to ahbab liye phirte hain

kis liye log hamein sar pe biThaenge faragh

hum kahan ke par-e-surKHab liye phirte hain