din ne itna jo marizana bana rakkha hai

din ne itnā jo marīzāna banā rakkhā hai

raat ko ham ne shifā-ḳhāna banā rakkhā hai

intiqām aisā liyā hai mirī tanhā.ī ne

shahr kā shahr bayābāna banā rakkhā hai

ḳhaak kā ḳhāna ġharībāna-badan hai ki jise

raunaq-e-ishq ne shāhāna banā rakkhā hai

ham ko ma.alūm hai ḳhuub apnī haqīqat so use

usī unvān kā afsāna banā rakkhā hai

mubtazil hone kā aap apnā maza hai varna

ham ne bhī ḳhud ko hakīmāna banā rakkhā hai

aadmī ho ki ḳhudā sab kā barābar hai vazn

ishq ne ek hī paimāna banā rakkhā hai

chaak kar kar ke hue tañg to dīvānoñ ne

chaak ko ab ke garībāna banā rakkhā hai

'farhatullah' hai vo aql kā putlā jis ne

farhat-ehsās ko dīvāna banā rakkhā hai

din ne itna jo marizana bana rakkha hai

raat ko hum ne shifa-KHana bana rakkha hai

intiqam aisa liya hai meri tanhai ne

shahr ka shahr bayabana bana rakkha hai

KHak ka KHana gharibana-badan hai ki jise

raunaq-e-ishq ne shahana bana rakkha hai

hum ko malum hai KHub apni haqiqat so use

usi unwan ka afsana bana rakkha hai

mubtazil hone ka aap apna maza hai warna

hum ne bhi KHud ko hakimana bana rakkha hai

aadmi ho ki KHuda sab ka barabar hai wazn

ishq ne ek hi paimana bana rakkha hai

chaak kar kar ke hue tang to diwanon ne

chaak ko ab ke garibana bana rakkha hai

'farhatullah' hai wo aql ka putla jis ne

farhat-ehsas ko diwana bana rakkha hai