دن نہایت سخت تھے راتیں بھی تھیں بھاری بہت

دن نہایت سخت تھے راتیں بھی تھیں بھاری بہت

پھر بھی میں نے کی ہے جینے کی اداکاری بہت

دشت کی تنہائیاں بھی عشق کی ساتھی نہیں

حسن کی شاہی کو مل جاتے ہیں درباری بہت

خوبصورت کفر پر ایمان لانا ہی پڑا

عمر بھر میں بھی رہا ہوں اس کا انکاری بہت

ان کی گلیوں کے بھکاری یاد آتے ہیں مجھے

تنگ جب کرتی ہے مجھ کو میری ناداری بہت

خیر کے پہلو بھی روشن ہوں دعا یہ کیجئے

عام ہوتی جا رہی ہے دل کی بیماری بہت

ساتھ ہو جائیں اگر جذبات کی سچائیاں

فن بھی دے جاتا ہے غزلوں کو طرحداری بہت

شہر میں اب کے سخن فہمی کا موسم دیکھنا

شاعروں نے کی ہے غالبؔ کی طرف داری بہت

ڈر رہا ہوں لطف منزل کا نہ کھو جائے رئیسؔ

بڑھ گئی ہے ان دنوں رستے کی ہمواری بہت