din par soch sulagti hai ya kabhi raat ke bare mein

din par soch sulagtī hai yā kabhī raat ke baare meñ

koī baat nikal aatī hai kā.enāt ke baare meñ

ek dūsre se kab saare sayyāre Takrāte haiñ

pur-umīd bahut huuñ aise hādsāt ke baare meñ

kuchh sahtā huuñ guzarte hue zamāne ke lamhoñ kī sazā

kuchh kahtā huuñ nā-mumkin se mumkināt ke baare meñ

sote jāgte uThte baiThte apne hī jhagḌe nahīñ kam

aur ka.ī zātoñ kī uljhan ek zaat ke baare meñ

hairat kā ek apnā husn bhī hai larzā dene vaalā

koī pareshānī nahīñ us ke nabātāt ke baare meñ

ġhalat-salat sab ke apne apne andāze haiñ varna

kuchh bhī nahīñ kahā jā saktā kisī baat ke baare meñ

jab tak vo pahlī tarjīh rahegā sab ḳhairiyat hai

mausam ko hai tamām āgahī phuul paat ke baare meñ

qatre kī pahchān hī dariyā meñ gum ho jaanā hai kabhī

kaisā josh-o-ḳharosh hai us kī mulāqāt ke baare meñ

dil meñ koī chiiz chamaktī bujhtī rahtī hai jo 'zafar'

fikrmand bhī rahtā huuñ maiñ usī dhaat ke baare meñ

din par soch sulagti hai ya kabhi raat ke bare mein

koi baat nikal aati hai kaenat ke bare mein

ek dusre se kab sare sayyare Takraate hain

pur-umid bahut hun aise hadsat ke bare mein

kuchh sahta hun guzarte hue zamane ke lamhon ki saza

kuchh kahta hun na-mumkin se mumkinat ke bare mein

sote jagte uThte baiThte apne hi jhagDe nahin kam

aur kai zaton ki uljhan ek zat ke bare mein

hairat ka ek apna husn bhi hai larza dene wala

koi pareshani nahin us ke nabaatat ke bare mein

ghalat-salat sab ke apne apne andaze hain warna

kuchh bhi nahin kaha ja sakta kisi baat ke bare mein

jab tak wo pahli tarjih rahega sab KHairiyat hai

mausam ko hai tamam aagahi phul pat ke bare mein

qatre ki pahchan hi dariya mein gum ho jaana hai kabhi

kaisa josh-o-KHarosh hai us ki mulaqat ke bare mein

dil mein koi chiz chamakti bujhti rahti hai jo 'zafar'

fikrmand bhi rahta hun main usi dhat ke bare mein