din raat ki aafat ke siwa kuchh nahin aata

din raat kī aafat ke sivā kuchh nahīñ aatā

chāhat meñ musībat ke sivā kuchh nahīñ aatā

lo chaa.e meñ bhī chaa.e kī pattī nahīñ Daalī

tum ko to mohabbat ke sivā kuchh nahīñ aatā

duniyā kī har ik maañ meñ kamī ye hai ki us ko

bachchoñ kī hifāzat ke sivā kuchh nahīñ aatā

sapnoñ meñ bhī sapnoñ kā jahāñ DhūñDhne vaalo

sapnoñ meñ haqīqat ke sivā kuchh nahīñ aatā

dushman mire yāroñ se sabaq siikh rahe haiñ

yāroñ ko 'adāvat ke sivā kuchh nahīñ aatā

nekī bhī kamā.ī hai bhalā.ī bhī milī hai

par kaam to daulat ke sivā kuchh nahīñ aatā

is daur meñ apnā yā parāyā nahīñ koī

ab yaad zarūrat ke sivā kuchh nahīñ aatā

ḳhud apne kahe par vo 'amal kyoñ nahīñ karte

kyā un ko nasīhat ke sivā kuchh nahīñ aatā

din raat ki aafat ke siwa kuchh nahin aata

chahat mein musibat ke siwa kuchh nahin aata

lo chae mein bhi chae ki patti nahin Dali

tum ko to mohabbat ke siwa kuchh nahin aata

duniya ki har ek man mein kami ye hai ki us ko

bachchon ki hifazat ke siwa kuchh nahin aata

sapnon mein bhi sapnon ka jahan DhunDhne walo

sapnon mein haqiqat ke siwa kuchh nahin aata

dushman mere yaron se sabaq sikh rahe hain

yaron ko 'adawat ke siwa kuchh nahin aata

neki bhi kamai hai bhalai bhi mili hai

par kaam to daulat ke siwa kuchh nahin aata

is daur mein apna ya paraya nahin koi

ab yaad zarurat ke siwa kuchh nahin aata

KHud apne kahe par wo 'amal kyon nahin karte

kya un ko nasihat ke siwa kuchh nahin aata