دن رات کی آفت کے سوا کچھ نہیں آتا

دن رات کی آفت کے سوا کچھ نہیں آتا

چاہت میں مصیبت کے سوا کچھ نہیں آتا

لو چائے میں بھی چائے کی پتی نہیں ڈالی

تم کو تو محبت کے سوا کچھ نہیں آتا

دنیا کی ہر اک ماں میں کمی یہ ہے کہ اس کو

بچوں کی حفاظت کے سوا کچھ نہیں آتا

سپنوں میں بھی سپنوں کا جہاں ڈھونڈھنے والو

سپنوں میں حقیقت کے سوا کچھ نہیں آتا

دشمن مرے یاروں سے سبق سیکھ رہے ہیں

یاروں کو عداوت کے سوا کچھ نہیں آتا

نیکی بھی کمائی ہے بھلائی بھی ملی ہے

پر کام تو دولت کے سوا کچھ نہیں آتا

اس دور میں اپنا یا پرایا نہیں کوئی

اب یاد ضرورت کے سوا کچھ نہیں آتا

خود اپنے کہے پر وہ عمل کیوں نہیں کرتے

کیا ان کو نصیحت کے سوا کچھ نہیں آتا