dini hain sab koi raati nahin hai

dinī haiñ sab koī raatī nahīñ hai

añdheroñ kā koī sāthī nahīñ hai

to kyā be-ḳhvāb hī rah jā.ūñgā maiñ

mujhe to niiñd hī aatī nahīñ hai

ki har bīmār un āñkhoñ se davā paa.e

shifā-ḳhāna ye ḳhairātī nahīñ hai

lagā hai kitnā sarmāya zabāñ kā

ye kār-e-shā.irī zaatī nahīñ hai

tarāshī jā chukī ummīd kī lau

diyā jaltā huā baatī nahīñ hai

sadā jaatī to hai us kī galī meñ

vahāñ se le ke kuchh aatī nahīñ hai

akele paḌ ga.e ham kārvāñ meñ

ki ab ke vo mirā sāthī nahīñ hai

lage haiñ saare sāzinde badan ke

magar ye ruuh naġhmātī nahīñ hai

rahegā be-badan hī 'farhat-ehsās'

havā par koī deh aatī nahīñ hai

dini hain sab koi raati nahin hai

andheron ka koi sathi nahin hai

to kya be-KHwab hi rah jaunga main

mujhe to nind hi aati nahin hai

ki har bimar un aankhon se dawa pae

shifa-KHana ye KHairaati nahin hai

laga hai kitna sarmaya zaban ka

ye kar-e-shairi zati nahin hai

tarashi ja chuki ummid ki lau

diya jalta hua baati nahin hai

sada jati to hai us ki gali mein

wahan se le ke kuchh aati nahin hai

akele paD gae hum karwan mein

ki ab ke wo mera sathi nahin hai

lage hain sare sazinde badan ke

magar ye ruh naghmati nahin hai

rahega be-badan hi 'farhat-ehsas'

hawa par koi deh aati nahin hai