دیا ہے دل تمہیں اپنا سمجھ کر

دیا ہے دل تمہیں اپنا سمجھ کر

امانت ہے اسے رکھنا سمجھ کر

چڑھائی تیغ ابرو کیا سمجھ کر

ہم آئے قتل کی ایما سمجھ کر

نہ بل کھائے کہیں دست نزاکت

اٹھائیے ذرا پردا سمجھ کر

شراب شوق سے ساقئ مدہوش

ہمارے زخم کو بھرنا سمجھ کر

مجھے محراب ابرو بس ہے تیری

کروں سجدہ تجھے کعبہ سمجھ کر

نہیں مطلب ہمیں دیر و حرم سے

جہاں جاتے ہیں گھر تیرا سمجھ کر

چمن میں چہچہا اب شاخ گل پر

تو کرنا بلبل شیدا سمجھ کر

ہر اک کوچے میں میرے واسطے طفل

لیے پتھر ہیں دیوانا سمجھ کر

مہ گردوں پہ شب کو چاندنی میں

نظر کرتا ہوں رخ تیرا سمجھ کر

گلے پر قاتل بے رحم میرے

چلایا تو نے خنجرؔ کیا سمجھ کر