diya jala bhi nahin jo use bujha diya jae

diyā jalā bhī nahīñ jo use bujhā diyā jaa.e

hameñ bhī vaqt se pahle hī ab sulā diyā jaa.e

yahī razā hai agar kātib-e-muqaddar kī

to jo panap na sake phir use miTā diyā jaa.e

rahe na zad meñ kisī bhī badalte mausam kī

nihāl-e-dil pe vahī phuul ik khilā diyā jaa.e

kisī ko paane kā ehsās is tarah se rahe

to bazm-e-dost se dushman ko hī uThā diyā jaa.e

falak ko chhūne kī be-sūd aarzū na mile

maiñ ḳhaak huuñ to mujhe ḳhaak meñ milā diyā jaa.e

yahī mutālba 'raziya' hai aaj munsif se

hamāre sabr-o-razā kā koī sila diyā jaa.e

diya jala bhi nahin jo use bujha diya jae

hamein bhi waqt se pahle hi ab sula diya jae

yahi raza hai agar katib-e-muqaddar ki

to jo panap na sake phir use miTa diya jae

rahe na zad mein kisi bhi badalte mausam ki

nihaal-e-dil pe wahi phul ek khila diya jae

kisi ko pane ka ehsas is tarah se rahe

to bazm-e-dost se dushman ko hi uTha diya jae

falak ko chhune ki be-sud aarzu na mile

main KHak hun to mujhe KHak mein mila diya jae

yahi mutalba 'raziya' hai aaj munsif se

hamare sabr-o-raza ka koi sila diya jae