diya nahin hai mujhe chhup-chhupa ke rone tak

diyā nahīñ hai mujhe chhup-chhupā ke rone tak

nazar meñ us ne rakhe mere ghar ke kone tak

maiñ kyā batā.ūñ ki biite haiñ kyā kaḌe mausam

shadīd karb se guzrā huuñ sañg hone tak

vo raushnī kī tarah tez tez chaltā hai

guzar na jaa.e kahīñ aañkh meñ samone tak

koī karegā nahīñ dekh-bhāl phūloñ kī

sab ehtimām-e-bahārāñ hai biij bone tak

tabāh to nahīñ kartā tamām niiñd mirī

mujhe ye dard jagātā hai sirf sone tak

kahāñ vo maslak-e-pākīzgī rahā 'āsim'

hai ab to mashq-e-vuzū dast-o-pā ko dhone tak

diya nahin hai mujhe chhup-chhupa ke rone tak

nazar mein us ne rakhe mere ghar ke kone tak

main kya bataun ki bite hain kya kaDe mausam

shadid karb se guzra hun sang hone tak

wo raushni ki tarah tez tez chalta hai

guzar na jae kahin aankh mein samone tak

koi karega nahin dekh-bhaal phulon ki

sab ehtimam-e-bahaaran hai bij bone tak

tabah to nahin karta tamam nind meri

mujhe ye dard jagata hai sirf sone tak

kahan wo maslak-e-pakizgi raha 'asim'

hai ab to mashq-e-wuzu dast-o-pa ko dhone tak