diya raushan hai lekin tirgi ka raqs jari hai

diyā raushan hai lekin tīrgī kā raqs jaarī hai

ḳhirad hairat-zada hai bebasī kā raqs jaarī hai

tasavvur ā.īna-ḳhāna hai har tasvīr afsurda

bikhartī kirchiyoñ meñ zindagī kā raqs jaarī hai

musaḳhḳhar kar liyā insāñ ne ujlat meñ sitāroñ ko

mohabbat mar rahī hai āgahī kā raqs jaarī hai

jo kahnā thā nahīñ kahte jo kahte haiñ vo be-ma.anī

kahī hai an-kahī aur an-kahī kā raqs jaarī hai

duā-e-nīm-shab jugnū mirī āñkhoñ meñ kyā chamke

qatār-andar-qatār ik raushnī kā raqs jaarī hai

jo mere lafz tum ko vajd meñ mahsūs hote haiñ

mire andar mirī dīvāngī kā raqs jaarī hai

safī' chāroñ taraf yādoñ ke lashkar hamla-āvar haiñ

junūñ andar junūñ hai be-ḳhudī kā raqs jaarī hai

diya raushan hai lekin tirgi ka raqs jari hai

KHirad hairat-zada hai bebasi ka raqs jari hai

tasawwur aaina-KHana hai har taswir afsurda

bikharti kirchiyon mein zindagi ka raqs jari hai

musaKHKHar kar liya insan ne ujlat mein sitaron ko

mohabbat mar rahi hai aagahi ka raqs jari hai

jo kahna tha nahin kahte jo kahte hain wo be-mani

kahi hai an-kahi aur an-kahi ka raqs jari hai

dua-e-nim-shab jugnu meri aankhon mein kya chamke

qatar-andar-qatar ek raushni ka raqs jari hai

jo mere lafz tum ko wajd mein mahsus hote hain

mere andar meri diwangi ka raqs jari hai

safi' chaaron taraf yaadon ke lashkar hamla-awar hain

junun andar junun hai be-KHudi ka raqs jari hai