diya saqi ne awwal rose wo paimana masti mein

diyā saaqī ne avval roz vo paimāna mastī meñ

ki maiñ nā-āshnā pī kar huā dīvāna mastī meñ

sharāb-e-ātishīñ vo hai ki do ik ghūñT piite hī

jo saaqī ho to aatā hai nazar paimāna mastī meñ

nazar aatā hai mujh ko boriyā bhī taḳht-e-tā.ūsī

gadā rakhtā hai goyā shaukat-e-shāhāna mastī meñ

koī kahtā hai masjid hai koī kahtā hai bāhar jā

ilāhī kyā maiñ bhūlā huuñ rah-e-mai-ḳhāna mastī meñ

nasha thā mujh ko aur yāroñ ne chāhā chhīn leñ botal

magar kaam aa ga.ī kuchh jur.at-e-rindāna mastī meñ

ḳhabar kyā thī vaa.iz hai yahī samjhā ki saaqī hai

uThā aur uTh ke jā lipTā maiñ betābāna mastī meñ

mirī puujā thī kaif-añgez nazroñ kī parastārī

mirā sajda thā pesh-abrū-e-jānāna mastī meñ

qadam rakhtā kahīñ huuñ aur paḌtā hai kahīñ jā kar

'nushūr' is vaqt huuñ kuchh hosh se begāna mastī meñ

diya saqi ne awwal roz wo paimana masti mein

ki main na-ashna pi kar hua diwana masti mein

sharab-e-atishin wo hai ki do ek ghunT pite hi

jo saqi ho to aata hai nazar paimana masti mein

nazar aata hai mujh ko boriya bhi taKHt-e-tausi

gada rakhta hai goya shaukat-e-shahana masti mein

koi kahta hai masjid hai koi kahta hai bahar ja

ilahi kya main bhula hun rah-e-mai-KHana masti mein

nasha tha mujh ko aur yaron ne chaha chhin len botal

magar kaam aa gai kuchh jurat-e-rindana masti mein

KHabar kya thi waiz hai yahi samjha ki saqi hai

uTha aur uTh ke ja lipTa main betabana masti mein

meri puja thi kaif-angez nazron ki parastari

mera sajda tha pesh-abru-e-jaanana masti mein

qadam rakhta kahin hun aur paDta hai kahin ja kar

'nushur' is waqt hun kuchh hosh se begana masti mein