diye andheron ne baDh kar sahaare KHwabon ko

diye añdheroñ ne baḌh kar sahāre ḳhvāboñ ko

sirāt-e-shab se guzarte hamāre ḳhvāboñ ko

kuchh aur bojh uThānā bhī un ke zimme hai

koī to āñkhoñ ke sar se utāre ḳhvāboñ ko

chalā gayā hai jo nīñdeñ bikher kar merī

bulā.ūñ kaise ki aa kar sañvāre ḳhvāboñ ko

kahīñ ḳhalā-e-adam meñ zuhūr-e-nūr huā

dikhā.ī dene lage haiñ nazāre ḳhvāboñ ko

kahīñ jazīra-e-imkāñ kahīñ pe ta.abīreñ

bulā rahe haiñ bahut se kināre ḳhvāboñ ko

chhuḌā ke haath hue ratjagoñ meñ gum aise

talāsh karte haiñ ab istiḳhāre ḳhvāboñ ko

mizāj us ne bigāḌā hai umr bhar in kā

so ab ye vaqt kī marzī sudhāre ḳhvāboñ ko

diye andheron ne baDh kar sahaare KHwabon ko

siraat-e-shab se guzarte hamare KHwabon ko

kuchh aur bojh uThana bhi un ke zimme hai

koi to aankhon ke sar se utare KHwabon ko

chala gaya hai jo ninden bikher kar meri

bulaun kaise ki aa kar sanware KHwabon ko

kahin KHala-e-adam mein zuhur-e-nur hua

dikhai dene lage hain nazare KHwabon ko

kahin jazira-e-imkan kahin pe tabiren

bula rahe hain bahut se kinare KHwabon ko

chhuDa ke hath hue ratjagon mein gum aise

talash karte hain ab istiKHare KHwabon ko

mizaj us ne bigaDa hai umr bhar in ka

so ab ye waqt ki marzi sudhaare KHwabon ko