diye munDeron ke raushan qatar hone lage

diye muñDeroñ ke raushan qatār hone lage

laveñ tarāshne vaale farār hone lage

dabīz pardoñ pe mānūs lahreñ uThne lagī

havā ke haath darīchoñ se paar hone lage

adū bhī bharne lage dam tirī rifāqat kā

ab aise-vaise tamāshe bhī yaar hone lage

ab aane vaalī kisī rut kā intizār ho kyā

jaḌoñ se apnī shajar dāġhdār hone lage

falak ke purze ab uḌne meñ koī der nahīñ

pahāḌ sarke zamīnoñ meñ ġhaar hone lage

khulā mahāz to hogī hamārī paspā.ī

ham apne ḳhauf-e-darūñ kā shikār hone lage

safar hai saḳht bahut saḳht agle moḌ ke ba.ad

chamak rahe the jo manzar ġhubār hone lage

na koī mauj-e-tamāshā na aks-e-hairat 'ramz'

hamāre ā.īne be-e'tibār hone lage

diye munDeron ke raushan qatar hone lage

lawen tarashne wale farar hone lage

dabiz pardon pe manus lahren uThne lagi

hawa ke hath darichon se par hone lage

adu bhi bharne lage dam teri rifaqat ka

ab aise-waise tamashe bhi yar hone lage

ab aane wali kisi rut ka intizar ho kya

jaDon se apni shajar daghdar hone lage

falak ke purze ab uDne mein koi der nahin

pahaD sarke zaminon mein ghaar hone lage

khula mahaz to hogi hamari paspai

hum apne KHauf-e-darun ka shikar hone lage

safar hai saKHt bahut saKHt agle moD ke baad

chamak rahe the jo manzar ghubar hone lage

na koi mauj-e-tamasha na aks-e-hairat 'ramz'

hamare aaine be-e'tibar hone lage