diye nigahon ke apni bujhae baiTha hun

diye nigāhoñ ke apnī bujhā.e baiThā huuñ

tujhe maiñ kitne dinoñ se bhulā.e baiThā huuñ

mire liye hī dhaḌaktā hai kā.enāt kā dil

kahāñ akelā koī bojh uThā.e baiThā huuñ

ġhubār-e-rāh uḌe to koī umiid jage

maiñ kab se raah meñ palkeñ bichhā.e baiThā huuñ

hunar jo ḳhvāb churāne kā maiñ ne sīkhā hai

yahāñ pe kitnoñ kī nīñdeñ uḌaa.e baiThā huuñ

kahīñ vo mujh se mujhe maañg le to kyā hogā

maiñ apne aap ko kab kā gañvā.e baiThā huuñ

diye nigahon ke apni bujhae baiTha hun

tujhe main kitne dinon se bhulae baiTha hun

mere liye hi dhaDakta hai kaenat ka dil

kahan akela koi bojh uThae baiTha hun

ghubar-e-rah uDe to koi umid jage

main kab se rah mein palken bichhae baiTha hun

hunar jo KHwab churane ka main ne sikha hai

yahan pe kitnon ki ninden uDae baiTha hun

kahin wo mujh se mujhe mang le to kya hoga

main apne aap ko kab ka ganwae baiTha hun