do aalam ke aafat se dur kar de

do aalam ke āfāt se duur kar de

ik aisī nazar chashm-e-maḳhmūr kar de

nasīb-e-mohabbat hai ab vo tamannā

unheñ jo taġhāful se māzūr kar de

tire qurb kī haa.e ye shaan kyā hai

jo idrāk-e-hastī se bhī duur kar de

koī kis tarah paa.e us ham-nashīñ ko

jise justujū manziloñ duur kar de

jamāl us ko kahiye ki partav hī jis kā

hijāboñ ko nūrun-alā-nūr kar de

na ab hosh kā bas na tāqat junūñ meñ

ki hāl-e-tabī.at ba-dastūr kar de

'suhā' jalva-e-shoḳh shādāb un kā

shabāb-e-gulistāñ ko be-nūr kar de

do aalam ke aafat se dur kar de

ek aisi nazar chashm-e-maKHmur kar de

nasib-e-mohabbat hai ab wo tamanna

unhen jo taghaful se mazur kar de

tere qurb ki hae ye shan kya hai

jo idrak-e-hasti se bhi dur kar de

koi kis tarah pae us ham-nashin ko

jise justuju manzilon dur kar de

jamal us ko kahiye ki partaw hi jis ka

hijabon ko nurun-ala-nur kar de

na ab hosh ka bas na taqat junun mein

ki haal-e-tabiat ba-dastur kar de

'suha' jalwa-e-shoKH shadab un ka

shabab-e-gulistan ko be-nur kar de