do ghaDi un ke han guzar aae

do ghaḌī un ke haañ guzār aa.e

ishq kī āqibat sañvār aa.e

har nafas ik nayā tasādum hai

vaqt Thahre to kuchh qarār aa.e

kuchh to ho ahl-e-dil kī duniyā meñ

mai mile yā kahīñ bahār aa.e

apnā anjām-e-zīst kyā hogā

ham agar maut ko bhī haar aa.e

thak chukī hai shuā-e-shams-e-kuhan

raushnī kā nayā manār aa.e

ham azal se ravāñ the sū-e-adam

raah meñ apne hī mazār aa.e

har jagah ziist kār-farmā hai

hashr tak maut ko pukār aa.e

Thahrā radd-e-amal bhī ek amal

vaqt lauTe to baar baar aa.e

do ghaDi un ke han guzar aae

ishq ki aaqibat sanwar aae

har nafas ek naya tasadum hai

waqt Thahre to kuchh qarar aae

kuchh to ho ahl-e-dil ki duniya mein

mai mile ya kahin bahaar aae

apna anjam-e-zist kya hoga

hum agar maut ko bhi haar aae

thak chuki hai shua-e-shams-e-kuhan

raushni ka naya manar aae

hum azal se rawan the su-e-adam

rah mein apne hi mazar aae

har jagah zist kar-farma hai

hashr tak maut ko pukar aae

Thahra radd-e-amal bhi ek amal

waqt lauTe to bar bar aae