do-jahan ke husn ka arman aadha rah gaya

do-jahāñ ke husn kā armān aadhā rah gayā

is sadī ke shor meñ insān aadhā rah gayā

har ibādat-gāh se ūñchī haiñ mil kī chimniyāñ

shahr meñ har shaḳhs kā īmān aadhā rah gayā

maiñ to ghabrāyā huā thā ye bahut achchhā huā

yaad un kī aa ga.ī tūfān aadhā rah gayā

phuul mahke rañg chhalke jhiil par ham tum mile

baat hai ye ḳhvāb kī rūmān aadhā rah gayā

tum ko aanā thā nahīñ aa.e kaho maiñ kyā karūñ

āsmāñ par chāñd sā mehmān aadhā rah gayā

kyuuñ hai itnī tez-rau batlā mirī umr-e-ravāñ

zindagī kī raah kā sāmān aadhā rah gayā

muḳhtasar sā likh diyā 'asrār' ne un ko javāb

ḳhat milā par aap kā ehsān aadhā rah gayā

do-jahan ke husn ka arman aadha rah gaya

is sadi ke shor mein insan aadha rah gaya

har ibaadat-gah se unchi hain mil ki chimniyan

shahr mein har shaKHs ka iman aadha rah gaya

main to ghabraya hua tha ye bahut achchha hua

yaad un ki aa gai tufan aadha rah gaya

phul mahke rang chhalke jhil par hum tum mile

baat hai ye KHwab ki ruman aadha rah gaya

tum ko aana tha nahin aae kaho main kya karun

aasman par chand sa mehman aadha rah gaya

kyun hai itni tez-rau batla meri umr-e-rawan

zindagi ki rah ka saman aadha rah gaya

muKHtasar sa likh diya 'asrar' ne un ko jawab

KHat mila par aap ka ehsan aadha rah gaya