donon aankhon mein bhar liya jae

donoñ āñkhoñ meñ bhar liyā jaa.e

husn mahfūz kar liyā jaa.e

zindagī se kalām karne ko

izn-e-nūr-e-sahar liyā jaa.e

ham se pādāsh meñ mohabbat kī

jaan lī jaa.e sar liyā jaa.e

be-ḳhatā hai to phir bhī Dar ai dost

be-ḳhatā hī na dhar liyā jaa.e

shahr-e-ummīd kitnā dilkash hai

aao kuchh din Thahar liyā jaa.e

kaisā sarsabz hai tumhārā saath

is ko tasvīr kar liyā jaa.e

donon aankhon mein bhar liya jae

husn mahfuz kar liya jae

zindagi se kalam karne ko

izn-e-nur-e-sahar liya jae

hum se padash mein mohabbat ki

jaan li jae sar liya jae

be-KHata hai to phir bhi Dar ai dost

be-KHata hi na dhar liya jae

shahr-e-ummid kitna dilkash hai

aao kuchh din Thahar liya jae

kaisa sarsabz hai tumhaara sath

is ko taswir kar liya jae