donon hathon mein uThae hue bhaari patthar

donoñ hāthoñ meñ uThā.e hue bhārī patthar

mārne aa.e haiñ iisā ko havārī patthar

maiñ ne jo tere tasavvur meñ tarāshe the kabhī

le ga.e vo bhī mire ghar se pujārī patthar

aadmī aaj kahīñ jaa.e to kyūñkar jaa.e

sar pe sahrā to zamīñ saarī kī saarī patthar

sab se pahle mire bhaa.ī ne hī pheñkā mujh par

pahlā patthar hī mujhe ho gayā kaarī patthar

rahm ai gardish-e-daurāñ ye tamāshā kyā hai

phuul se shānoñ pe karte haiñ savārī patthar

jab koī ġhuncha khilā koī kalī chaTkī hai

le ke pahuñchī hai vahīñ bād-e-bahārī patthar

dil hai is āhū-e-darmāñda-o-bekas kī tarah

mārte haiñ jise mil mil ke shikārī patthar

sīna-e-sañg se dariyā nahīñ bahte dekhe

kaun kahtā hai ki haiñ dard se aarī patthar

naaz har but ke uThā paa.e na 'jāfar-tāhir'

chuum kar chhoḌ diye ham ne ye bhārī patthar

donon hathon mein uThae hue bhaari patthar

marne aae hain isa ko hawari patthar

main ne jo tere tasawwur mein tarashe the kabhi

le gae wo bhi mere ghar se pujari patthar

aadmi aaj kahin jae to kyunkar jae

sar pe sahra to zamin sari ki sari patthar

sab se pahle mere bhai ne hi phenka mujh par

pahla patthar hi mujhe ho gaya kari patthar

rahm ai gardish-e-dauran ye tamasha kya hai

phul se shanon pe karte hain sawari patthar

jab koi ghuncha khila koi kali chaTki hai

le ke pahunchi hai wahin baad-e-bahaari patthar

dil hai is aahu-e-darmanda-o-bekas ki tarah

marte hain jise mil mil ke shikari patthar

sina-e-sang se dariya nahin bahte dekhe

kaun kahta hai ki hain dard se aari patthar

naz har but ke uTha pae na 'jafar-tahir'

chum kar chhoD diye hum ne ye bhaari patthar