donon jahan se aa gaya kar ke idhar udhar ki sair

donoñ jahāñ se aa gayā kar ke idhar udhar kī sair

pūchho na jā rahā huuñ maiñ karne ko ab kidhar kī sair

miTTī kī ḳhūb-sūratī miTTī meñ mil ke dekhiye

chhoḌiye is makīn ko kījiye apne ghar kī sair

dekhī nahīñ thī chaak ne achchhī tarah se dekh lī

vaise bhī dil-fareb thī kuuze pe kūza-gar kī sair

seb ke peḌ ke tale geñd vo ghūmtī huī

puurī kashish se khīñch kar karne lagī hai sar kī sair

vaise to kuchh nahīñ patā itnā patā hai baaġh hai

barsoñ se kar rahā huuñ maiñ jis ke liye udhar kī sair

terī hī sair ke liye aatā rahūñgā baar baar

terā thā saat din kā shauq merī hai umr bhar kī sair

pahlī nazar meñ kā.enāt utnī khilī ki jitnī thī

phir jo nazar ne sair kī kartī rahī ḳhabar kī sair

donon jahan se aa gaya kar ke idhar udhar ki sair

puchho na ja raha hun main karne ko ab kidhar ki sair

miTTi ki KHub-surati miTTi mein mil ke dekhiye

chhoDiye is makin ko kijiye apne ghar ki sair

dekhi nahin thi chaak ne achchhi tarah se dekh li

waise bhi dil-fareb thi kuze pe kuza-gar ki sair

seb ke peD ke tale gend wo ghumti hui

puri kashish se khinch kar karne lagi hai sar ki sair

waise to kuchh nahin pata itna pata hai bagh hai

barson se kar raha hun main jis ke liye udhar ki sair

teri hi sair ke liye aata rahunga bar bar

tera tha sat din ka shauq meri hai umr bhar ki sair

pahli nazar mein kaenat utni khili ki jitni thi

phir jo nazar ne sair ki karti rahi KHabar ki sair