dost dushman sab hi pahchane gae

dost dushman sab hī pahchāne ga.e

merī duniyā se sanam-ḳhāne ga.e

koī hai dil meñ mire jab se makīñ

dasht-e-dil se saare vīrāne ga.e

kis qadar dil meñ bharosa thā mire

rafta rafta log pahchāne ga.e

raushnī bhī ab nahīñ raunaq na vo

bujh ga.ī jab sham' parvāne ga.e

ab yahāñ koī sadā aatī nahīñ

kaun se sahrā ko dīvāne ga.e

kaun kis ko yaad rakkhe 'ḳhālida'

saath mere mere afsāne ga.e

dost dushman sab hi pahchane gae

meri duniya se sanam-KHane gae

koi hai dil mein mere jab se makin

dasht-e-dil se sare virane gae

kis qadar dil mein bharosa tha mere

rafta rafta log pahchane gae

raushni bhi ab nahin raunaq na wo

bujh gai jab sham' parwane gae

ab yahan koi sada aati nahin

kaun se sahra ko diwane gae

kaun kis ko yaad rakkhe 'KHalida'

sath mere mere afsane gae