dost jab dil sa aashna hi nahin

dost jab dil sā āshnā hī nahīñ

ab hameñ ġhair kā gila hī nahīñ

jis kā dil dard-āshnā hī nahīñ

us ke jiine kā kuchh mazā hī nahīñ

ek dam ham se vo judā hī nahīñ

gar judā ho to vo ḳhudā hī nahīñ

āshnā.ī pe us kī mat jaanā

le ke dil phir vo āshnā hī nahīñ

ḳhaak chhānī jahān kī lekin

dil-e-gum-gashta kā patā hī nahīñ

laakh māshūq haiñ jahāñ meñ magar

aah vo naaz vo adā hī nahīñ

sa.i-e-be-fā.eda hai chāragaro

maraz-e-ishq kī davā hī nahīñ

dard-e-dil un se ham kahā hī kiye

par unhoñ ne kabhī sunā hī nahīñ

sar phirātā hai kyuuñ abas nāseh

merā kahne meñ dil rahā hī nahīñ

ab vo aa.e to aa.eñ kyā hāsil

tāqat-e-arz-e-mudda.ā hī nahīñ

maiñ to kyā gosh-e-charḳh ne bhī 'aish'

aisā bedād-gar sunā hī nahīñ

dost jab dil sa aashna hi nahin

ab hamein ghair ka gila hi nahin

jis ka dil dard-ashna hi nahin

us ke jine ka kuchh maza hi nahin

ek dam hum se wo juda hi nahin

gar juda ho to wo KHuda hi nahin

aashnai pe us ki mat jaana

le ke dil phir wo aashna hi nahin

KHak chhani jahan ki lekin

dil-e-gum-gashta ka pata hi nahin

lakh mashuq hain jahan mein magar

aah wo naz wo ada hi nahin

sai-e-be-faeda hai chaaragaro

maraz-e-ishq ki dawa hi nahin

dard-e-dil un se hum kaha hi kiye

par unhon ne kabhi suna hi nahin

sar phiraata hai kyun abas naseh

mera kahne mein dil raha hi nahin

ab wo aae to aaen kya hasil

taqat-e-arz-e-muddaa hi nahin

main to kya gosh-e-charKH ne bhi 'aish'

aisa bedad-gar suna hi nahin