dost ki dushmani se waqif hun

dost kī dushmanī se vāqif huuñ

aap kī be-ruḳhī se vāqif huuñ

ye matā-e-azīz hai merī

sozish-e-dā.imī se vāqif huuñ

raas aa.e na jis ko jannat bhī

dil kī us bekalī se vāqif huuñ

nang-e-zulmat vatan meñ aa.ī jo

is na.ī raushnī se vāqif huuñ

aaj kī zindagī pe hai ye baar

aaj ke dā.imī se vāqif huuñ

ek shaitān ik farishta hai

aadmī aadmī se vāqif huuñ

āshnā bhī hue haiñ begāne

dosto muflisī se vāqif huuñ

kaun dekhegā pairahan sad-chāk

apnī is be-kasī se vāqif huuñ

lamha bhar khul ke ḳhaak meñ milnā

phuul kī tāzgī se vāqif huuñ

tuur pe jo na pā sake muusā

dil kī us sarḳhushī se vāqif huuñ

faash haiñ mujh pe rāz-e-yazdānī

azmat-e-bandagī se vāqif huuñ

ahl-e-tanqīd mutma.in rahiye

adab aur zindagī se vāqif huuñ

dost ki dushmani se waqif hun

aap ki be-ruKHi se waqif hun

ye mata-e-aziz hai meri

sozish-e-daimi se waqif hun

ras aae na jis ko jannat bhi

dil ki us bekali se waqif hun

nang-e-zulmat watan mein aai jo

is nai raushni se waqif hun

aaj ki zindagi pe hai ye bar

aaj ke daimi se waqif hun

ek shaitan ek farishta hai

aadmi aadmi se waqif hun

aashna bhi hue hain begane

dosto muflisi se waqif hun

kaun dekhega pairahan sad-chaak

apni is be-kasi se waqif hun

lamha bhar khul ke KHak mein milna

phul ki tazgi se waqif hun

tur pe jo na pa sake musa

dil ki us sarKHushi se waqif hun

fash hain mujh pe raaz-e-yazdani

azmat-e-bandagi se waqif hun

ahl-e-tanqid mutmain rahiye

adab aur zindagi se waqif hun