دوست کی دشمنی سے واقف ہوں

دوست کی دشمنی سے واقف ہوں

آپ کی بے رخی سے واقف ہوں

یہ متاع عزیز ہے میری

سوزش دائمی سے واقف ہوں

راس آئے نہ جس کو جنت بھی

دل کی اس بیکلی سے واقف ہوں

ننگ ظلمت وطن میں آئی جو

اس نئی روشنی سے واقف ہوں

آج کی زندگی پہ ہے یہ بار

آج کے دائمی سے واقف ہوں

ایک شیطان اک فرشتہ ہے

آدمی آدمی سے واقف ہوں

آشنا بھی ہوئے ہیں بیگانے

دوستو مفلسی سے واقف ہوں

کون دیکھے گا پیرہن صد چاک

اپنی اس بے کسی سے واقف ہوں

لمحہ بھر کھل کے خاک میں ملنا

پھول کی تازگی سے واقف ہوں

طور پہ جو نہ پا سکے موسیٰ

دل کی اس سر خوشی سے واقف ہوں

فاش ہیں مجھ پہ راز یزدانی

عظمت بندگی سے واقف ہوں

اہل تنقید مطمئن رہیے

ادب اور زندگی سے واقف ہوں